To The Moon

《別人笑我太瘋癲，我笑別人看不穿》嘅分享奧祕

思考智庫 日誌：2026/10/13-3

上文提到無償付出最大嘅受益者竟然係自己，今次就詳細講講當中的分別，同埋我寫呢篇文章嘅原因。

最大嘅回報係咩？咪就係我自己囉！

喺投資邏輯上其實一模一樣。喺未遇上 TQQQ 之前，我自己就像隻無頭烏蠅咁，東買少少、西買少少，從來冇細心研究過一隻股票。投資標的雖然多，但大部分都係打緊「冇把握之仗」。

直到我重遇 TQQQ，仲不斷從各項數據證實佢係超優質嘅投資標的之後，我就好似一個浪子回頭嘅壞男人，終於知道自己「情歸何處」。我開始修心養性，用「金字塔投資策略」去打有把握嘅仗——TQQQ。

### 咩係『金字塔投資策略』？

金字塔投資策略，係我 D45 認為到目前為止，喺 TQQQ 身上獲利最有效嘅方法。呢個策略嘅核心係「金字塔式遞增注碼」，層數多寡、疏密完全由操作者自己決定。佢嘅目的係將平均價拉低，容易獲利。相比起個股好容易因為消息面一面倒而出現單邊走向，TQQQ 作為納指三倍槓桿 ETF，每時每刻都在反映不同成分股嘅利好利淡角力，就算係最平淡嘅牛皮行情，都有充足嘅波動套利空間。只要精準捕捉反彈節奏、分段沽出、靈活調倉，絕大多數情況都可以即日獲利。至於長期持有就更加簡單，只要精準咁放在心目中嘅位置就得啦。

由於金字塔策略嘅成效取決於資金夠唔夠厚，於是我便想方法令資金「回塘」（回籠）。最直接嘅方法，就係同啲壞股票「割蓆」，唔再打冇把握嘅仗。隨著資金不斷回塘，勝算亦加快。經歷過多年實戰打磨，我早已吃透市場節奏、掌握 TQQQ 嘅波動規律、學會儲備子彈、剋制衝動、唔亂入市、唔急於一時，喺壓力中從容操作、喺波動中穩定獲利。

呢啲全部都係我毅然決定為 TQQQ 平反嘅原因。就算冇收取分毫利益，我依然看透那些重要數據寫成文章，同網友討論、反思。喺呢個反覆嘅程序中，意外產生咗一般投資者冇嘅良好心理質素——一種即使失手不幸「坐艇」，信心亦絲毫未損嘅底氣同霸氣，信心甚至比贏家更強！講緊一些只能喺底氣十足之下才敢開口講嘅說話，例如：

『我雖然坐艇，亦坐得比別人快樂。』

我之所以「牙擦」成咁，係因為我從來唔會無啦啦「拋浪頭」（吹牛），而係對投資標的落過苦功，瞭解佢嘅屬性同能力之後作出嘅「神預測」，而且屢屢被證實，絕非「狼來了」！

「坐艇都快樂過人」嘅來龍去脈

D45所有文章｜我持續買入TQQQ的理由（終極四核心完整版：長揸＋短炒＋信念＋信仰）2026‑9‑21｜D45 :十六年，八次分割，一個人的覺醒｜十六年分割八次的隱性股皇｜離經叛道：開枝散葉百子千孫論TQQQ拆細後產生的複利效應｜D45 : 我已令 AI 輸得『心服口服』兼認『冇品』--香港,加油!｜D45：掌握旋律 成就非凡｜歷史一再證實TQQQ是穩賺不賠的長勝將軍｜TQQQ定投回報竟比QQQ高的爆冷原因：多數投資者看不懂的隱藏優勢｜思考智庫:2026‑10‑10‑2｜兩個低調高手：意外封皇的真實故事｜D45系統｜實戰入心流完整心法｜無償工作，為我帶來的「無價回報」｜《別人笑我太瘋，我笑別人看不穿》嘅分享奧祕為了進一步解釋 D45 並唔係信口開河，我順便講講呢句帶點高傲、略為「吋嘴」嘅話係點嚟。呢度係我在 2026 年 9 月尾寫嘅一篇文章題目，當時我還滿手 TSLL 蟹貨，有數千股 TSLL 喺度坐緊艇，價值不菲。換作係其他投資者，肯定「震過貓王」，自知投資結果咁糟糕，大都會低調處理，然後靜候股價到位靜雞雞賣咗算數，再劏雞還神答謝神恩。邊度仲有人敢講得咁大口：『我雖然坐艇，亦坐得比別人快樂。』？

我敢講，係因為今天嘅我已非從前嘅我。從前嘅我係匹夫一名，面對重大虧蝕風險，一樣會震過貓王、偷偷賣咗算數；邊會有人好似我咁大膽寫得咁牙擦？如今回想亦確實誇張咗少少，但事實上喺寫嗰一刻，我確實係充滿信心。因為如今我做任何決定都有一個既定目標，唔會再好似昔日咁得過且過。而為了表示對工作嘅認真，我更加不惜用返以前喺職場時慣用嘅方法——自製壓力去達成目標。壓力係必然要面對嘅，很多時人在江湖，想逃都逃唔掉；相反，如果你唔怕壓力，仲懂得運用佢、將佢變成動力，反而能為自己加添能量。

返回講嗰句話嘅現場，當時我手握 4,829 股 TSLL，平均價為 9.45，但股價跌穿落到 9.1 以下，出現帳面虧損。但因為我投資前做過大量資料蒐集，所以才下較大注碼；又因為我熟悉呢隻股嘅走勢，相信佢嘅彈力絕不止於去到 9.45 就停步。如果佢一舉穿破 9.45 會點？呢個就係我嘅世界了！我當時咁寫：

『以買入價 9.45 USD、持股數 4,829 股計算，總成本為 45,634.05 USD（摺合港幣約 358,227 元）。我以此為基礎，若我呢一刻開始一股唔放，股價一旦超越 9.45 USD，股價每升 0.01，我將獲得 48.29 USD 嘅利潤。』

結果點樣？當然係水到渠成！我亦因此刷新咗自己嘅毛利記錄，我最新嘅單日毛利記錄HKD $28,591 就係咁樣得返嚟！

我喺度重提，主要目的並唔係想話畀你聽我點威，而是想透過老虎賜給我的呢片樂土，去寫一些喺其他投資網站睇唔到嘅嘢。呢啲說話聽落似閒話家常、從不刻意說教，但卻係舉足輕重，就係投資最重要嘅一環：心理質素。若果冇好的心理質素，我永遠只會停留在「劏雞還神」嘅層次，永遠突破唔到自己嘅記錄。心理質素決定成敗，股神「貪婪與恐懼」嘅經典比喻亦源於此。管理得好嘅就係贏家；管理唔好嘅，就必定係輸家。

大家大概會問我：你做咩要寫出來？你好好得閒咩？你寫出來老虎畀幾多稿費你呀？

你問嘅理由好簡單、好直接，我嘅解釋你哋可能都聽過，但我再加添一些個人意見，令文章更加立體。我經常說，寫作係我嘅第二生命。當我寫作到忘我境界時，就是許多創作人都渴望擁有嘅「神來之筆」進場嘅時候。喺呢個時候，很多不凡嘅點子就會自然走出來，而呢啲文章喺我事後重睇，自己都覺得感歎。

但第二生命嘅延續，仲要搵到一些值得寫嘅題材。遺憾係，當初老虎社區叫我加入時，我都搵唔到題材。喺我不知所措之際，竟然畀我遇見生命中最重要嘅「人」——我將佢加個括號，係因為佢根本唔係人，而係一隻喺網上搜尋會獲得百分百負評嘅「納指三倍槓桿類型 ETF」(TQQQ)。當 D45 發現外間對佢嘅指控全源於誤解時，嗰種莫名的怒火就湧咗上嚟，因為我由細到大，到呢一刻都成日被人誤解。

（叉開話題：我對家庭嘅睇法）

(在此，我必須叉開話題，因為呢度係我對家庭嘅主要睇法，請見諒。)

有睇過我自傳嘅人都知道，當年因為公屋富戶政策關係被迫外闖置業，背負上沉重嘅樓按重債，因而背上「忽略家庭」呢個原罪。呢一點我係承認嘅，因為當年我確實要專心一致去處理債務。對此，我承認並寫出自己嘅感受，希望得到家人原諒。我曾經三番四次重睇自傳而感觸落淚，我喊，係因為我替自己高興，因為我終於放下咗包袱，勇於承認自己嘅過失。

但我向弟妹認錯，唔代表佢哋全對，只是我比佢哋更勇敢去面對問題。寫到呢度，心中團火又嚟！我承認我忽略家庭，但唔代表我唔關心家庭。作為家中長子，我雖然少返屋企，但亦知道家庭裡面有咩問題。有些問題係小事，唔想變都冇所謂；但有些係大問題，我必定要提出，呢個先係長子嘅職責。但每當我提出自己對問題嘅睇法時，卻被人扣上『搞事份子』嘅罪名。

喺呢度，我好想向家人放話，以下係我對家庭嘅睇法，可能會引起閣下不適。我會有話直說，因為呢度係我回憶錄好重要嘅一環。你哋若果唔想知，敬請停止閱讀；若果你願意睇，亦係好事，起碼你知道大佬嘅出發點喺邊，別再視我為破壞份子就足夠。我亦好想你哋知道，我們兄弟姊妹之間之所以有著『永恆嘅隔膜』，要我一個人負全責係唔公平嘅，因為你哋亦應該負上一些責任。

呢度係我嘅主場，你若果唔願意睇，可以立刻停止……

當你發現一個人有些缺點足以令佢難於立足於現在職場時，你會點做？正常都會有話直說吧！我就是喜歡喺家庭最直言嗰個，亦因為咁樣被人界定係家庭嘅破壞份子。

咁多位兄弟姊妹之中，以四妹學歷最高，佢曾先後就讀於兩間最知名的高尚學府，但佢最怕見到我。原因係我同佢見面不多，每次發現佢有些明顯嘅陋習，我都會直接告訴佢咁樣唔好，但很明顯佢係唔接受嘅。久而久之，我哋之間便建立咗一幅無形嘅牆。

我最先發現佢有明顯陋習，早於佢求學階段。每次返家吃飯，媽媽叫佢幫手洗碗，佢若不是裝作聽唔到，咪就是阿媽嗌破喉嚨都無動於衷，理由係佢要溫習。我知道咁樣唔對，想叫佢幫輕阿媽工作量，佢竟然將個矛頭反指向我，意思係因為我返嚟食飯先令阿媽嗌佢幫手。講到尾，佢要溫習，總之要佢幫手係冇可能嘅。

到食飯時，佢永遠擺出一副無精打採嘅樣子，經常嗌著好累好累，仲不時狂打喊露嗌到拆天咁。我見到咁，便作出善意提點，佢竟然向我發脾氣：『真係好累嘛！』仲喊埋出來話我針對佢。對此，我嗰位虔 your 基督教徒嘅三妹睇喺眼內，卻從不發表意見；而爸爸雖然有插口，但也只是說：「一家人食飯要開開心心！」呢句表面上冇問題，但實際上佢唔明白，佢個女兒終日躲喺房內當避風港，想見佢嘅唯一時間就係食飯。爸爸唔明白真相我唔埋怨佢，但佢隨後講嘅一句令我感到百般無奈：

『（佢唔做家務唔緊要），最多第日請工人。』

呢一槍最要命！即係代表全家都覺得冇問題，問題出喺我呢個「問題製造者」身上。

妹妹喺態度上出現明顯問題，喺佢哋眼中覺得係小問題、無傷大雅。最令我莫名其妙嘅，係虔誠教徒三妹明顯冇做好家姐嘅角色。大家都知道，要令一個人墮落好容易，溺愛佢就得。四妹嘅問題一看便知，佢讀過心理學，又喺好幾家著名機構當過管理層，同四妹喺同一個單位共同成長，點可能唔知問題所在？或許喺我質疑四妹有問題時，佢發表意見係「以大局為重」，就由得大佬孤立無援，永遠擔當搞事份子好了。

妹妹已經同外界脫曬節，佢哋唔覺得有問題，兩位家姐更加待佢特別包容。佢哋彷彿唔知道，過份包容等於縱容，佢哋表達對妹妹嘅愛，其實係害。佢哋正在製造一個又一個假象，出來滿足一個自身有問題卻懵然不知嘅大學生——一個被人縱壞、只聽美言，當聽到唔合聽嘅說話就以為係故意針對嘅妹妹；一個連家姐講句較為中性嘅評價NOT BAD都難以接受，要家姐改為“VERY GOOD”先肯收貨嘅特殊份子。

作為大佬嘅我知道問題嚴重，曾作出多次勸告，可惜全部不得要領，換嚟嘅係洗脫唔清嘅『疏忽照顧家庭』惡名。我嘅苦心佢哋察覺唔到，但我嘅遠見佢哋不得不佩服得五體投地——因為四妹如今已成為一隻迷途羔羊，一隻縱使有不俗學歷，但搵工四處碰壁；縱有機會獲聘亦被炒，仍然唔知自己不足，老係埋怨別人待佢差嘅受害者。

對此，我仲有話要說，更作出特別聲明：我並唔係針對教會，而是真心想知道原因。我嗰位口口聲聲宣揚大愛嘅虔誠基督教徒三妹，嗰位我每次提起教會就以為我冒犯天主嘅妹妹：你心目中兄弟姊妹嘅定義喺邊度？喺你心目中，係咪教會嘅兄弟姊妹先係真嘅兄弟姊妹，自己同生共長嘅反而唔係？從我嘅分析，你有三個兒子全部被你管教得聽聽話話，但你卻冇做好家姐嘅角色，原因何在？我敢肯定說句,若你的兒子有著四妹的相同陋習,以你的性格,你必定會嚴肅看待,必定要佢更正為止.同樣是親人,為什麼以雙重標準處理?你每次喺重要關頭都默不發聲，你沉默係咩意思？我好想知道。

結語：無懼風浪，笑看人生

喺度要同各位道個歉，我一口氣將心裏積壓已久嘅冤屈同憤怒寫出來。為什麼會無啦啦寫出來？因為我嘅遭遇同 TQQQ 一樣，我替 TQQQ 辯護，彷彿就在替自己辯護，只不過呢個係證券版。

現在憑著老虎社區賜畀我呢片樂土，正正式式話畀大家知前因後果。正因為要替自己（TQQQ）辯護，我不惜盡覽所有以往嘅數據，撰寫一篇又一篇離經叛道、同主流完全相反嘅文章。老虎社區亦由最初感到猶疑、冇第一時間推文，到後期通知我文章瀏覽量極高，連冷飯菜汁（舊作）都唔放過。對於反應咁好，我確實係意想不到嘅。

亦由於自己將全副心力放在 TQQQ 上，經過不斷交流與反思，不自覺地建立了屬於自己嘅底氣。我漸漸發現：人毋須無恥，亦可以無敵！

人若果對自己嘅心理質素充分掌握，對自己嘅投資標的充分了解，你就唔會視風浪係偶然而來而做錯事，將一些唔應該放嘅優質標的作恐慌性拋售；反而你會好似《黑天鵝》作者塔雷伯（Nassim Nicholas Taleb）咁，視風浪同黑天鵝係必定會嚟嘅。憑著對歷史嘅高度瞭解，喺黑天鵝來臨時，其他人感到不知所措、震過貓王，你依然可以氣定神閒、處變不驚，更能從早已設定好嘅部署中狠狠地賺上一筆鉅款，喺 28 歲之年就成為富翁。

佢之所以成功，完全係因為佢嘅心理質素；而我之所以自我感覺良好，亦係靠替偶像辯護，透過分享、交流去打好底子，令我在風浪來臨時不再六神無主、震過貓王，反而喺別人恐懼時趁低吸納優質標的，令我在全新賽道上又可以『快人一步，理想達到』。

呢啲全部都係靠「分享」得返嚟嘅。今天我之所以可以處變不驚，亦係從以往不斷嘅無償付出而來。

所以，每當有人對我頻頻寫作感到奇怪，甚至懷疑我嘅動機時，我總是笑而不語。正所謂：

「別人笑我太瘋癲，我笑別人看不穿！」

大D45所有文章｜我持續買入TQQQ的理由（終極四核心完整版：長揸＋短炒＋信念＋信仰）2026‑9‑21｜D45 :十六年，八次分割，一個人的覺醒｜十六年分割八次的隱性股皇｜離經叛道：開枝散葉百子千孫論TQQQ拆細後產生的複利效應｜D45 : 我已令 AI 輸得『心服口服』兼認『冇品』--香港,加油!｜D45：掌握旋律 成就非凡｜歷史一再證實TQQQ是穩賺不賠的長勝將軍｜TQQQ定投回報竟比QQQ高的爆冷原因：多數投資者看不懂的隱藏優勢｜思考智庫:2026‑10‑10‑2｜兩個低調高手：意外封皇的真實故事｜D45系統｜實戰入心流完整心法｜無償工作，為我帶來的「無價回報」｜《別人笑我太瘋癲，我笑別人看不穿》嘅分享奧祕家層次唔同，我都冇你咁好氣了！